Slavlje kaja. Čistog, domačeg, toplog. Kaj tam zvoni bez srama, bez brige o tom kaj bu neko rekel jer se kajkavski spominamo. Kaj nas dočeka raširenih rok i podeli nam kušlece na saki obraz kak i jengova negovatelica, ravnatelica OŠ Franje Viktora Šignjara vu Virju, draga nam Marica Cik – Adaković i vučitelice Silvana, Maja i Đurđica.

Virofski školski ljudi već dvajst četri lete vu srca svojih đakof i đakof okolnih mest sadiju seme kaja.  Semeje se zbira pri babicama koje nas furt nasmejeju svojim pripovestima i koje kak da pred kamerama bar deset let mlajše postaneju.

Sosedi, rodbina, tate i mame zbiraju i čuvleju seme kaja. Na kvizu ga sadiju i raste v srcima dece z vrtiča koja v belim košulicama deliju veselje. Ovo je leto ž njima veselje delila i jena babica. Oči su joj bile pone dobrote pa smo i mi veliki poželeli sesti joj se v krilo i poslušati ju.  Popevati ž njom. Boga moliti.

Kaj raste vu srcima đakof i vučitelov koji se po par mesecof za kviz pripravlaju. Pišeju. Crtaju. Snimleju. Recitiraju, glumiju, popevleju na kaju. Vučiju se, igraju se na kaju. Pobeđuju i gubiju na kaju. Rasteju v kaju i za kaj.  Čuvleju blago domače reči. I makar je sam jeno prvo mesto, si isto dobivleju – kaj vu srcu.

Neko bi rekel da je to sam velika briga, da od toga nema ništ koristi. Ali ni tak. Đaki koji su več mame, tate, tete vu vrtiču, vučitelice pa i župniki postali, z veseljem svoje znanje dale na virofskom kvizu deliju.

I kak da mi onda nebu toplo pri srcu jer znam da su puce z moje družine pomagale slaviti kaj z Galovičevim Pozdravlenjem, da ga je slavila i naša ravnatelica Anđelka koja je bila v žiriju, koja ni kajkavka po rođenju, ali postaje kajkavka po duši.

Pono toga se promenilo od kak sam ja bila mala, pono toga se zgubilo, ali ne smemo zgubiti kaj. Z Virja smo donesli seme kaja, ostane nam još samo težake najti i plodnu zemlicu. Zakaj i mi ne bi kaj sejali?

                                                                                                                                                                  Vučitelica

Maja Priher